ملخص شامل لأنواع التعلم

 ودلوقتي بعد ما خلصنا كل انواع التعلم ,  خلينا ناخد ملخص عنها كلها  , عشان نقدر نلم الدنيا ونشوف الصوره كامله. في اول الباب :-

 ذكرنا الاسباب اللي تخلينا نتعلم انواع التعلم , وقلنا ان فوائد معرفه انواع التعلم كثير  , ولكن احنا خدنا منها سببين بس وهما :-

1- امتلاك ادوات جديده لتطوير الذات

 2- منع التسويف او المماطله

 في امتلاك ادوات جديده لتطوير الذات اتكلمنا عن مفهوم الفاعليه الذاتيه اللي اخترع المفهوم ده كان عالم النفس البرت بنادوره  , وقلنا ان الفاعليه الذاتيه تكمن في ايمانك بقدراتك على تحدي الصعوبات وانجاز المهام  , وقلنا ان معرفتك بانواع التعلم بتساعدك على كده عن طريق عده اسباب ذكرناها بالتفصيل.

 منع المماطله والتسويف وعرفنا ايه هو التسويف , وايه هي اسبابه ,  وازاي بياثر علينا  , وازاي نتغلب عليه

 وبعد كده دخلنا في انواع التعلم  , وكل نوع منهم ذكرنا تعريفه ومين العالم اللي اكتشفه واراء العلماء فيه واهم تجربه حصلت فيه وازاي الدول استفادت منه وازاي احنا كمان نستفيد منه.

 وبدانا باول نوع وهو التعلم الشرطي الكلاسيكي وقلنا اللي اخترع النوع ده كان عالم النفس بافلوف واستفدنا منه ان احنا نعمل محفزات لنفسنا قبل واثناء المذاكره , وان ده بيخلينا نربط المذاكره بشيء احنا بنحبه وبالتالي بنحب المذاكره.

 وبعد كده دخلنا على النوع الثاني وهو التعلم الشرطي الاجرائي وقلنا ان اللي اخترع النوع ده هو عالم النفس الامريكي سكينر وفي التعلم الشرط الاجرائي بيعتمد على المكافاه والعقاب لتدعيم السلوك الايجابي وتقليل السلوك السلبي , وسالنا نفسنا سؤال وهو ما الفرق بين التعلم الشرطي الكلاسيكي والتعلم الشرطي الاجرائي ؟؟ وعرفنا ان الفرق ما بينهم قائم على ميعاد المكافاه  , يعني في التعلم الشرطي الكلاسيكي بتبقى المكافاه قبل واثناء السلوك  , اما في التعلم الشرط الاجرائي بعد السلوك  , ولا يوجد عقاب في التعلم الشرطي الكلاسيكي

 بعد كده دخلنا على التعلم بالملاحظه وعرفنا ان اللي اخترع الاسلوب ده كان عالم النفس الكندي الامريكي البرت بنادوره وتجربته الشهيره الدميه بوبو وازاي نستفيد من النوع ده من التعلم.

 والنوع اللي بعده كدة كان التعلم المعرفي وعرفنا ان التعلم المعرفي خليط ما بين التفكير النقدي والتفكير التحليلي والذاكره المفاهيميه  , وعرفنا ازاي نستفيد منه في حل المشاكل.

 والنوع تعلم اللي بعده كان التعلم الضمني  , وعرفنا اننا ممكن نتعلم من غير ما ناخذ بالنا , واننا في حاله دائمه من التعلم من البيئه المحيطه حتى لو احنا مش مركزين  , وعرفنا ازاي نستفيد منه في حفظ القران مثلا

 بعد كده كان معانا التعلم الصريح وده النوع المشهور من التعلم في المدارس والجامعات  , وزي العاده ذكرنا ازاي برده نستفيد منه

 واخر عنوان كان معانا وهو السرحان وفقدان التركيز وعرفنا ازاي نخرج من الحاله دي  , ورسمنا استراتيجيه للخروج من الحاله السرحان .

ده كان الباب الثاني كله اعتقد دلوقتي بقى عندنا تصور كامل وده هيفيدنا كثير وخلي بالك ان الدرس ده غالبا هترجع له كثير لغايه اما تحفظ طرق التعلم وانواعه وتبتدي تطبقهم وعشان تستفيد اكثر هتلاقي في المقدمه اليه الاستفاده من هذه الدوره واللي هيكمل في الخاتمه ان شاء الله انما دلوقتي اقدر اقول لك عاش يا بطل وكمل وخلي هدفك انك توصل للخاتمه انت دلوقتي تقريبا خلصت اكثر من ثلتين الدوره فالله ينور وكمل وربنا معاك.